السلام عليكم ~
"
تدوينتي اليوم يمكن تكون [ مخيفة للبعض ] ويمكن تكون [ مشوقة ] ويمكن لا قدر الله تكون [ منرفزة ] للبعض الاخر !
عموما حابه انوه ! انو اي كلام اقوله ماله دخل بالـ [ الغيبات الدينية ] المختص بها الله عز وجل
ولا فيها اي خدش للدين من اي ناحية ..
لا اشوف احد يقذفني بالـ[ ملحدة ] او ماشابه ! كل مافي الامر اني محبه للاطلاع واخذ المفيد واترك ما يسيء لديني
ويستحيل اني اطلع على مواضيع الحادية بحته ! وتدوينتي بعيدة عن الالحاد تماما !
قبل لا ابدأ احب اعتذر للانفصام اللغوي اللي عندي
اتكلم بالعامية ثم بالفصحى ثم بالعامية وهكذا xD !
بس احب لما اتكلم بموضوع فلسفي علمي اتكلم بالعامية عشان اقدر اوصل الفكره بسهوله ^^ ~
علم الميتافيزيقيا !
اكيد سمعتوا فيه من قبل ! ولو ماسمعتوا فيه يمكن سمتعوا بمسمى ثاني له مثل :
علم ماوراء الطبيعة - علم ماوراء النفس - علم الخوارق - الباراسكيولوجي .. وغيرها
الميتافيزيقيا علم قديم جدا جدا ! اهتم فيه البشر سواء كانوا علماء او لا
كانوا الفلاسفة اليونان يسموه بالـ [ الفلسفة الاولى ] ! لان الفلسفة الثانية هو العلم الطبيعي اللي كلنا عارفينه وهو الفيزياء !
هو علم يهتم بتفسير الخوارق الملموسة اللي حدثت في الارض ( مو الغيبية ) اللي عجزت الفيزياء تفسيرها
ما انكر ان علماء الغرب دخلوا في مواضيع دينية احنا في غنى عنه مثل الروح وغيره
الروح في الميتافيزيقا .. طبعاً العلماء الملحدين [ الفيزيائيين ]
مؤمنين بالمادة بحيث انهم ما يصدقوا بوجود الروح في الجسد !
لكن الفيزيائيين المهتمين بالميتافيزيقيا اكتشفوا انو فعلا الانسان عباره عن جسد وروح !
وهالشي [ كمسلمين ] عارفينه من اول ما طلعنا للحياة !
وعلى النقيض تماما .. بعض الملحدين ماديين جداً ومايعترفون بالغيبات و بعلم مثل الميتافيزيقيا !
"
زرقاء اليمامة ؟ كهوف التسيلي ؟ الحاسة السادسة ؟ الديجافو ؟ التخاطر ؟
كل هذي الامور واكثر يهتم فيها الميتافيزيقيا و راح اذكر بعضها :
زرقاء اليمامة :
ملخص قصة زرقاء اليمامة للي مايعرفها : هي امرأة عربية عاشت في الجاهلية
كانت عندها القدرة على انها تشوف مسيرة الثلاث ايام ! ! فتنبه قبيلتها من العدو قبل لا يوصلون عندهم
هذا يسمونه بالجلاء البصري .. يعني شي ما تقدر العين الطبيعية تشوفه
وفيه برضوا الجلاء السمعي .. يسمع فوق المعدل او ادنى من المعدل الطبيعي للاذن البشرية
طبعا انا ما اقدر اجزم اذا هي قصة حقيقية او مجرد اساطير ! لكن تصنف بالميتافيزيقيا
لان هالشي وراء الطبيعة اللي احنا معتادين عليها ! ومانقدر نفسرها فيزيائياً :)
الله وحده عارف اذا فعلاً فيه امرأة عاشت على الارض اسمها زرقاء اليمامة او لا !
كهوف تاسيلي :
فيه جبال بين ليبيا و الجزائر .. كان فيه رحاله اسمه ( بربنان ) في القرن الماضي
اكتشف هذا الرحالة ان في هذه الجبال كهوف سماها بتاسيلي
طيب وش الغريب فيها ؟ الغريب و المدهش ان فيه نقوش ورسومات في الكهف
صور رجال ونساء بملابس فضاء ومركبات فضائية و اشياء حديثة جداً ما عرفناها الا في قرننا هذا !
طيب بتقولون اكيد ان هالرسومات حديثة ومجرد خدعه من احد ..
لكن العجيب ان هالرسومات عمرها يزيد عن عشر الاف سنه !!
عرفوا عمرها باستخدام الاساليب الحديثة للآثار ومنها الكربون المشع وغيره ..
هذي الكهوف صارت لغز لحد وقتنا الحاضر
حاولوا الكثير تفسيرها .. فبعض التفسيرات جت على النمط التالي :
1. فيه اللي قال ان مخلوقات فضائية نزلت كوكبنا ونقشت الرسومات قبل اكثر من 10 الاف سنه
وهالاحتمال جدا جدا ضئيل وما يدخل المخ !
2. فيه منهم اللي قال ان هذي الاثار رسمها بعض الناجين من قارة اطلانطس !
حسب ماذكر افلاطون فهذي القاره كانت في قمة العلم و التطور فيمكن هالرسومات ترجع لأحد عاش في هذي القارة ؟
بالرغم من اننا مو متأكدين هل اطلانطس فعلا موجوده او مجرد اساطير !!
3. يمكن تكون هذي الرسومات لحضاره قديمة عاشت عيشة متطورة وماشابهه لقرننا !
واندثرت هذي الحضاره مثل الكثير من الحضارات اللي ما وصلتنا اخبارها ولا علم من علومها !
كهوف التاسيلي مازلت لغز لحد الان .. فصنفت ضمن علم [ الميتافيزيقيا ]
صنفت ضمن ماوراء الطبيعية .. لان الطبيعية العلمية تقولنا انو احنا الحضارة المتطوره بالعلم ومافيه حضاره سبقتنا بمثل علمنا !
الديجافو !
الديجافو ! او [ شفته من قبل ] هي ظاهره مرت فينا كلنا !
مثلاً افتتحو محل جديد ..خنقول مطعم مثلا ! .. وقررت تروح له مع اصدقائك
عند البوابة ! تنحت ثانيتين بعدين قلت [ اوه لحظة ! كأني شفت هالشي من قبل ! ]
وانت بحياتك ما دخلت هالمطعم اصلا !
تسمى هالحالة بـ الديجافو ! deja vu
طبعا تم تفسير الديجافو بطرق علمية كثيرة ! ومنها انو عقلك ما استقبل المعلومة الا متأخر
او الالياف البصرية ارسلت اشارات فسرها الدماغ بموقف ثاني .. وغيرها من التفسيرات
من التفسيرات العلمية اللي اقنعتني .. هذا المقطع :
لكن هالتفسير ماهو معتمد عليه بشكل تام ! يعني ما تأكدو منه فعلياً .. مجرد تنبؤات علمية
و الاغلبية صنفوه ضمن الميتافيزيقيا !
الحاسة السادسة والتخاطب :
الكثير مننا مر بموقف .. انه يفكر بشخص معين وفجأه يتصل عليه هالشخص ! او يرسل له رسالة او يدخل عنده !
او موقف الأم مثلا لما تحس بوخزه في صدرها وتقول [ احس ان ولدي فلان فيه شي ] ويكون هالولد في موقف سيء لا سمح الله
لما تفكر بشي .. ويكون شخص اخر يفكر فيه ويطرح فكرته وتنصدم انها مشابهه لفكرتك
لما تحلم بشخص و تتفاجأ ان هالشخص حلم بنفس الحلم !
لما تفكر بشي .. و يحلم فيه شخص اخر << وانا شخصياً مريت بهالموقف !
صدفة ؟ ايه نعم ممكن تكون صدفة .. بس هل العلم يعترف بالصدف ؟ طبعاً لا !
فعلمياً هي ضمن الميتافيزيقيا ! فالفيزياء ما تعترف بشي مو مادي مثل الحاسة السادسة !
هذي بعض الظواهر اللي اقد اسردها لكم
ولكن هالعلم واسع وفيه ظواهر كثيره واساطير ما تطرقت لها
اشوف ان هالظواهر هي الشائعة بيننا غالبا عشان كذا طرحتها !
"
كل هذي المواقف و الظواهر علمها عند الله سبحانه وتعالى
حتى وان اكتشف البشر جواب بسيط لهذي الالغاز فالجواب الاساسي بعلم الله تعالى
لكن الاطلاع عليها و التعجب شي مشوق صراحة وانا شخصياً احب اقرأ في هذي الغرائب
ومؤمنة ان العلم اللي وصلنا له مجرد قطره في محيط ! وفيه اسرار و افكار ما وصلنا لها وبعضها يستحيل نوصلها
ومؤمنة ان فيه حضارات عاشت قبلنا بطرق معيشية ما نتخيلها وماني عارفه ايش هي اساليب حياتهم
اتمنى اكون اوصلت فكره بسيطة عن هذي الظواهر
وهذا شي يستحق التفكر بعظيم قدرة الله تعالى !
اترك التعليق لكم ! :)
أزال المؤلف هذا التعليق.
ردحذفانتي زيي احب اقرأ عن الاشياء الغريبة وزي ماتقولي مؤمنة ان العلم اللي وصلنا مجرد شيء بسيط وان فيه حضارات عاشت بطرق مستحيل نتوقعها
ردحذف"وما اؤتيتم من العلم الا قليلا" وقدروها ب10% بالمية من الحياة، يعني ان حنا مانعرف الا هال10% فوق كذا نتعجب اذا سمعنا عن هالكهوف والحاسة السادسة الخ
الا على طاري الحاسة السادسة سالفة انك تحلم نفس الحلم مع شخص ثاني بنفس الوقت صارت لي بعد xD وصارت لي اني احلم بشخص ابد ماعرفه ثم اشوفه بنفس اليوم وذي تخرع صراحة :)
نرجع لسالفة الايمان بهذي الاشياء، شيء ممتع نبحث عن هالاشياء استغرب ان بعض الناس مخها محدود على طريقة عيشنا الحالية
انا اؤمن ايمان قوي بالمخلوقات الفضائية خخخخ، بس مهوب ذوليك الخضر ابو عيون كبيرة ﻻ احس ان فيه ناس زينا بالضبط المضبط عايشين في كواكب اخرى نغس عيشتنا نفس تقاليدنا وحضاراتنا
يعني سبحان الله تخيلي قد ايش الارض كبيرة، ثم تخيلي قد ايش باقي الكواكب اكبر منا، وبعد تخيلي كبر المجرة وفوق كذا حنا جزء صغييير ﻻ يعادل 1% من باقي المجرات والكواكب
يعني انا ما اشكك في قدرة الله، بس سبحان الله معقولة كل هالكواكب والمجرات وبس حنا الموجودين؟ :| احس ان فيه احد يشاركنا هالعالم، بشر زينا او مخلوقات نفس او اكبر من تفكيرنا
على فكرة قد قريتي كتاب ملائكة وشياطين لدان براون؟ انصحك فيه بشكل كبير يتكلم عن الفيزياء والمتنورين و و الخ، مره بيعجبك *^*
عموما كنت بقول شيء بس من كثر الفلسفه نسيت وش هو xD