السلام عليكم ^^
من زمان ما كتبت بلوق .. ما كان عندي شي مميز اكتبه :(
وعشان ما اكون قاطعة .. قلت اكتب تدوينة بسيطة
||
||
الافلام الوثائقية كثير يتابعونها .. لكن فئة نادرة [ يدمنونها ]
انا من الفئة الثانية xD اتكلم معكم بجدية .. ما اقدر انام بدون ما اشوف فيلم وثائقي
وياليتي اشوف فيلم وثائقي يخليني انام مرتاحه .. الافلام الوثائقية اللي اتابعها كلها جرائم و تحقيقات و غموض و اسرار
وامور بوليسية و يلا عاد .. احلامي كلها اكشن
عندي ادمان الاشياء البوليسية سواء كانت خيالية [ مؤلفة ] او مقتبسة من قصص حقيقية
من الافلام الوثائقية :
هروب ماكر أو ( كسر القضبان )
مادري وش الفرق بين الاسمين .. بس كلهم سلسلة وحدة
هالسلسلة من الافلام خلتني اكون بجانب المجرمين للاسف هههههههههههه
بعض الحلقات يعرضون لنا المجرم الحقيقي( من خلف القضبان ) يقص قصته و خطته للهروب من السجن
وبعض الحلقات يكتفي المخرج بعرض قصة المجرم بمراسلته ورقياً لان السجن يمنع بعض المجرمين من
الخروج للاعلام !
اعترف ان المجرمين اذكياء بشكل فضيع :| ! يعني لو استخدموا هذا الذكاء بحياتهم الاجتماعية
عشان يعيشون عيشة كريمة ما كان دخلوا السجن
جد جد ذكائهم يعجبني حسبي الله عليهم :(
الادرينالين ينتشر بجسمي من بداية الفلم لنهايته ! اتخيل نفسي مكان المجرم :(
و اخاف اذا مسكوه و استانس اذا هج منهم :))
مع انهم مجرمين بجرائم بشعة بس شسوي ! غصب عني اتحمس معهم :(
و دايم افكر اذا كنت مكانهم كيف راح تكون خطة هروبي ؟ :))
اسباب هروبهم من السجن كثيره
فيه منهم اللي عادي عنده يعيش مؤبد بالسجن لكن يهرب بسبب تهديد اشخاص له داخل السجن بالقتل
او تعاملهم الدنيء له
وفيه منهم اللي ما يتحمل يعيش مسجون سنين طويلة ويبي الحرية
وفيه اللي يهرب لانه محكوم عليه بالاعدام
وفيه اللي يهرب لانه يبي يقابل شخص او يسوي شي قبل لا يموت مسجون
وللاسف كلهم بالنهاية راح ينمسكون و ينحطون بالسجن الانفرادي
وراح يزيدون عليهم مدة الحكم :) !
ملفات محيرة
الفرق في افلام هذي السلسلة ان اصحاب القصة الحقيقية موب هم اللي يقصون لنا القصة
هي ملفات عن قصص قديمة وتاريخية غامضة ومحيرة وعلماء التاريخ يبدون ارائهم فيها او افكارهم وثقافتهم عنها
بعضها قصص مخيفة لكن يغلبني الفضول من عنوانها بس !خصوصا انها حقيقية :)
وبعضها قصص معتاده لكن يضيفون لنا علماء التاريخ اضافات جديدة غير معروفه عنها
مسجون في الغربة
بدت سلسلة هالافلام في 2006 .. تجميع لقصص الرحلات المأساوية للمسجونين في بلاد غير بلادهم
احب هالسلسلة بالرغم انها ما تنافس كسر القضبان بالحماس و الذكاء و الخطط
لكن احس بمشاعر اللي ينسجنون بعيد عن موطنهم بين مسجونين ما يعرف يتفاهم او يتأقلم معهم
خصوصا اذا كانت بنت !
مع ان الغباء يسيطر على اصحاب القصص هنا .. واغلبهم من مهربي المخدرات
و اعترف انه يجيني غثيان بنص الليل لما اتابع قصة مسجون هرب المخدرات
لكن اضطر بالنهاية ارحمهم :(
حتى قصة مهرب المسكر في السعودية مع ان الاحداث اتوقع مبالغ فيها
و كرهت صاحب القصة من اول ما بدأ يقص حكايته وحقدة للسعودية
الا اني رحمته بالنهاية لما دخل السجن :(
احسن شي ف هالسلسلة ان كل مسجون في النهاية يبين قد ايش ندمان انه
تعامل بالمخدرات و هربها .. وادمنها
(لان اغلب السلسلة عن المهربين )
جرائم غامضة من ملفات التحقيق الفيدرالي
مشابه لتصنيف هروب ماكر و مسجون في الغربة
ولكن بطريقة اعمق
هي قضايا مسجلة في مكتب التحقيق الفيدرالي ويغلب عليها الغموض بعكس باقي الجرائم المعتادة
عرضت هذي القضايا للاعلام بعد الانتهاء من التحقيق فيها
يعرضون طرق التحقيق في الجريمة و مدى دهاء و خبث المجرم الى نهاية احداث التحقيق
راح تحس ان الدنيا ما فيها امان بعدها
لكن راح تستفيد من ذكاء المحققين بكشف اسرار الجريمة
||
||
بالنهاية :
عارفه بتقولون وش هالبنت اللي تتابع كل هالجرائم
حتى اهلي يحاولون يقللون ادماني للافلام والروايات البوليسية
بس ياخي لو مستقبل التحقيق و التحري عندنا مضمون للبنات كان دخلته وانا مغمضة xD
عموماً هي مجرد هواية .. ويمكن لو كانت وظيفه لي على ارض الواقع راح اكره نفسي :))
لـ أي سؤال : http://ask.fm/amai0onna
ليست هناك تعليقات:
إرسال تعليق