♥ رحلتي لكوريا الجنوبية - الجزء الثاني !

السلام عليكم ^^ 

نستكمل تقرير رحلتي :) 
للي ما شاف الجزء الأول يضغط هنا 

ان شاء الله ما تكونون طفشتوا xD لان الجزء الثاني احسه امتع :$ 

||

فهاليوم قررت انه يكون يوم كي بوبي ودرامي xD 

فقررت ازور شركات الانترتينمنتس الكورية .. بالاضافة لمقهى كيوب :$♥

كوني بيوتي :0 كنت اصيح الا ازور هالمقهى :( ! 

فالبداية بالصدفة مرينا من شارع شركات التلفزيون الكوري 

ام بي سي و الكي بي اس ♥

بوستر كبير لدراما الحب جون كي :( ♥♥♥ !! 

||

بعدها دخلنا حاره ضيقة فيها مقاهي و فيها شركة كيوب و شركة جي واي بي 

اهلي استغربوا وش هالشركة اللي بهالحارة الضيقة xD ! 

حسابي عند كيووووب TT______TT 

هنا جتني الصيحة .. ابي اشوف بييست ! بس ما يسمحون للزوار بالدخول :(

تخيلوا اني شفتهم كان يغمى علي :(

هالسيارة قدام كيوب ومكتوب عليها [ ستار كار ♥♥♥ ] ومظللة ! 

لكن اشوف ظل ناس فيها يتحركون ههههههههه 

انتظرت ربع ساعة ابيهم ينزلون عشان اشوف مين ولا نزلوا منها :( !! 

وش ذا ما انكتموا ؟ :( حتى الدريشة ما فتحوها :( ! 

شركة الجي واي بي ^^

كان فيه حارس عند البوابة يمنع اي احد انه يقرب ! 

الجي واي بي كان قدامها كثير فانز ينتظرون .. عكس كيوب انا الوحيده اللي اتفرج عليها

هذا واحد نزل من السيارة وعلى طول دخل الشركة .. ما عرفنا مين :( !! 

اكيد مشهور بس ما شفت وجهه :( ! 

بعدها دخلت مقهى كيوب . كان زحمة ما قدرت اشتري شي اشربه .. بس صورت 

شوفوا يدين كيكي :(♥♥♥ ! و صورت يدين يوسوب بس صغيره مره مره ما توقعت هالادمي نتفة لهالدرجة xD

||

اهلي طفشوا و حسوا ان مافيه فايده من القعدة بهالحارة ههههههه 

ف ركبنا الباص ورحنا لمدينة 63 اللي فيها برج 63 المشهور :$ 

هالبرج عباره عن : 

متحف الشمع 

عرض 3 دي لفيلم عن البطاريق

المعرض المائي وحوض الاسماك 

الاطلالة العالية من البرج 

اول شي دخلنا المعرض المائي 

كان كبير جداً و جميييل :") 

بعدها دخلنا القاعة عشن نشوف فيلم البطاري ثري دي 

احنا توقعناه بيكون فيلم رهييب لان القاعة جميلة و كانوا المنظمين حريصين انهم يختمون عالتذاكر 

و وزعوا اجهزة الترجمة الانجليزية 

لكن للاسف ! ساعة الا ربع فيلم بايخ هههههههههه 

اذكر لما خلص وفتحوا الانوار لفيت لقيت كل الناس نايمين مافيه الا البزران صاحين 

هو مثل الفيلم الوثائقي بس ما دري كيف..  ما ينفهم 

حتى الكوريين ناموا وسحبوا عليه مع انه بلغتهم المفروض يفهمونه xD 

||

بعدها زرنا متحف الشمع الخاص بمشاهير العالم 

ابرهام لينكولن طلع من قبره وتقهوى معي :)) ! 

صار صديقي خلاص xD ! 

توقعت يحطون تماثيل لمشاهير كوريين لكن مافيه الا الحكام و الملوك الكوريين القديمين والرئساء :) 

||

واخيرا اخر شي في مبنى 63 .. سكاي ارت ^^ 

اطلالة جميلة على سوؤل من اعلى البرج ♥♥ ! 

فيه فوق مقهى و معرض صغير

عشان تستمع وانت تتفرج على المدينة من فوق ^^ 

اتوقع بالليل بتكون جميلة ! احب اشوف انوار المدينة من فوق :$ ♥♥

||

بعدها قلنا لازم نروح لنهر الهان ونشوف عرض جسر البامبو :)

فرحنا له بدري قبل لا يبدأ العرض .. العرض يبدأ الساعة 8 واحنا وصلنا هناك 6 xD 

كان مطر ... حظنا شين xD 

صار لي هنا موقف درامي :( ♥♥♥ ! 

جيت انا واختي بنقعد عالكراسي عشان نتفرج عالنهر 

وكانت الكراسي غرقانة موية من المطر ..

وكانت الكراسي اللي بجمبنا فيها شلة شباب كوريين 

وواحد منهم يناظرنا طول الوقت 

واحنا واقفين ونمسح الموية بيديننا 

بعدين جاء بكل كواته و مد منديله القماشي لنا :( ♥ ! هذاك المنديل المطرز اللي دايم نشوفه بالدراما :(♥

و احنا بدينا نتشكره وشوي ونبكي من لطافته :( ♥♥♥

قلت لاختي سوي نفسك بتتصورين عشان اصورهم هههههههههههه 

هذولا هم الشلة اللطيفة :( ♥♥♥ ! 

ياخي وش ذا :( حركات عيالهم نفس اللي نشوفه بالدراما :( توقعت الدراما مبالغ فيها بس طلعت تحاكي واقعهم :(  ! 

ايلوفيوووه يا ابو منديل :( ♥♥ ! انت حبي الأول خلاص :( ! * بتتصفق *

||

بما ان العرض الغوه عشان المطر .. رحنا كملنا يومنا بشارع دونغ دايمون * قلت لكم عنه بالبارت الاول * 

ورجعنا للبيت بدري لان ورانا رحلة لجزيرة جيجو الجميلة :$ 

||

من بكرا قمنا بدري واستعدينا و شلنا عفشنا وسوينا تشيك اوت من الفندق وودعنا طاقم الفندق الجميلين :$

و شدينا الرحال لمطار قيمبو ! 

مطار قيمبو يختلف عن مطار انتشون 

مطار انتشون عالمي .. بينما مطار قيمبو خاص بالسفر للمدن الكورية بالاضافة لليابان 

اتوقع لان اليابان هي اقرب شي لهم 

سافرنا بخطوط [ jeju air ] ♥

الطيارة من برا كلها صور لي مين هو :$ ومن جواء برضو 

لان هو العارض الرسمي لاعلانات خطوط جيجو ! 

من سيول لجيجو تقريبا ساعة بس

على قولة امي ( تخيلوا نفسكم بالفسحة وبتوصلون ) ههههههههههه 

اول ما طلعنا من مطار جيجو شفنا نخل بكل مكان هههههههههه 

نخل يشبه نخلنا بس التمر موب زين مثلنا :$ ! 

||

ركبنا التاكسي ورحنا للسكن حقنا ! 

كان بعيد عن المطار .. تقريبا ساعة :( !

هذا السكن حقنا في جيجو ^^ ♥♥♥♥ !! 

Yilon pension 

بيت ريفي عباره عن غرف موب كثيره 

يعني اللي كانوا ساكنين معنا ينعدون بالاصابع 

والله ان سعادتي فيه اكثر من سعادتي بافخم الفنادق :")

طلعت منه محمله بالذكريات ! 

طبعا اصحاب هالسكن هم اجوما و اجاشي لطيييفييين :( 

والله يعاملوننا كأننا عيالهم :( استانست معهم ! 

اول يوم بالليل تقهوينا معهم مع انهم ما يعرفون انجليزي مره بس سعاده :( 

هذي ماما اجوما اللطيفة :( !

احبها ياناس :( كل شوي تجيب لنا فواكه وتقطعها وتوزعها علينا ♥
و تطبخ لنا اكلات كورية ♥ و دايم اكون معها بالمطبخ نغسل الخضار هههههههههه xD 

و مره اخذتنا بسيارتها و مشتنا بالحارة وودتنا للبحر ♥♥xD

كانوا الناس اللي يمرون من عندنا يفقعون ضحك على اشكالنا 

لان السيارة صغيره وكلنا راكبين وزحمه هههههههههههههههه 

لو مسكونا المرور بنروح فيها xD 

وكل ما مرينا من احد قالنا [ هااي ! ويرجع يضحك xD ♥♥] ! 

هذا بابا اجاشي اللطيف :$ 

الصوره من سناب شات ههههههههههه ! 

كل يوم لازم يشرب قهوه عربية .. صار مدمن عليها 

ويقولنا [ اربيك كوفي باشيسو باشيسوو !! ]♥♥ يعني لذيذة :$ 

||

طبعا احنا جلسنا في جيجو 3 ايام 

اليوم اللي وصلنا فيه .. ويومين كاملين .. ويوم رجعنا فيه لسيول ^^ 

اليومين في جيجو كنا مسجلين في حملة سياحية اسمها [ ياها تور ] 

اليوم الأول ودونا عالجزء الشرقي من جيجو .. و اليوم الثاني عالجزء الغربي 

اليوم الاول في الرحلة السياحية : 

قابلنا التور قايد اللطيف .. كان فيه 2 تور قايدز كوريين 

واحد يتكلم بالانجليزي و وحده تتكلم بالصيني للسياح الصينيين وكلهم طيبين :$ 

تور قايدنا اللطيف :$ 

انا واختي بس نطقطق على لهجته .. الله يسامحنا :( ! 

اليوم الاول رحنا اول شي لل الهاليم بارك 

طبيعة خلابة بهالحديقة ! فيها كهوف باردة وفيها شلالات و بيوت شعبية قديمة لسكان جيجو ♥^^ 

بعدها ودونا بالباص للبحر ^^ وخلونا نمشي مسافة طووويلة :( 

و التور قايد يمشي بالباص يحترينا بالجهة الثانية هههههههههه 

كأنه يقولنا [ يلا تمارين !! ! ] 

كان الهواء منعش وبنفس الوقت الشمس حاره :( 

لكن الهواء اللي يجي من المحيط جمميل *^* !! 

بعدها ودونا لـ سبريتد قاردن .. حديقة تشبه الهاليم بارك تقريبا بس مافيها كهوف 

تغدينا فيها ^^ و تمشينا فيها شوي و لعبنا مع السمك xD 

وبعدين قالوا انهم بيودوننا لجبل مرتفع و في نهايته فيه معبد قديم 

الدرج كان طويل طويل طويل ومتعب :( 

رقينا ثلاث ارباعه ولما بقى ربع هونت و جلست مكاني وقعدت اتأمل الارض xD 

وش بستفيد ارقى كل ذا و اخرتها اشوف صنم بوذا :)) ! 

كنت مرتفعة مره عن الارض ومع ذلك اسمع اغنية اكسو طالعة من البيت اللي تحت :|

رافعين الصوت بشكل موب معقول xD 

طربانين هههههههههههههههههه !

||

بعدها رحنا لمتحف تيدي بير 

هالمتحف له فرع في برج نامسان لكن قلت لكم بالجزء الاول اننا ما دخلناه 

عشان نزوره في جيجو ^^ 

المتحف عبارة عن مجسمات لمشاهير العالم و الاحداث المشهورة بشخصية الدب تيدي ♥ ^^ 

إليزابيث :)

جدار برلين ♥ ^^

هنا كانو مسوين معرض لـ إلفيس بريسلي و الدبدوب يرقص ويغني ع اساس انه ايلفس xD

وفيه اشياء كثيره بالمعرض 

كانوا مسوين العرس الكوري التقليدي و عرض ازياء واشياء كثيره :$ ♥♥

اغلبها انا مصوره معها عشان كذا ما قدرت انزلها كلها هههههههههه 

||
لما طلعنا جات التور قايد حقت اللغة الصينية وعطتنا هدايا دباديب تيدي♥♥ :"""") 

جتني الصيحة وقعدت اشكرها .. جد جد كيوت هالانسانه :(  !

* صورة الهدية بالانستغرام * << مالي خلق ارفعها هنا ههههههه :(

وبكذا خلص يومنا الاول في الرحلة السياحية و سلمنا على التور قايدز و السواق اللطيف 

وقلنا لهم نشوفكم بكرا ^^ ! 

وصلنا قبل المغرب لبيتنا اللطيف عند الاجوما اللطيفة :$ 

وقعدنا معهم في حديقة البيت و بعدين طلعنا نتمشى معها عند البحر ^^ 

||

في اليوم التالي قمنا بدري ووقفنا عند محطة الباص ننتظر باصنا السياحي :$ 

و وقت ما اهلي ينتظرون رحت دخلت بقالة قريبة اشتري حليب وعصيرات لاننا ما افطرنا 

فيوم دخلت و اخذت العصيرات و الحليب ورحت احاسبهم كانت فيه حرمة واقفة 

كأنها ممثلة لابسة نظارة و كشخة وماسكة بيدها كاميرا صغيرة 

وتشوفني وتشوف اغراضي 

بعدين سألتني : ( من وين عرفتي هذي المنتجات ؟ :)  ) 

سؤالها كان غريب . يعني انا شريتهم لانه واضح انهم عصيرات وكذا .. بس سلكت لها وقلت من الانتر نت xD

بعدين قالت [ اووه .. عادي اصورك ؟ ] حسيت اني فخمة ههههههههه قلت يس يس اوف كورس :$ ♥

شكلها صحفية او تشتغل ف شركة لمنتجات تغذية xD 

||

المهم .. رحلتنا السياحية >> نرجع لها xD ! 

اول مكان رحنا له اليوم هو متحف الخدع البصرية ♥♥ ^^ 

يختلف عن فرع انسادونق .. يعني نفس الفكرة بس الاشكال و اللوح تختلف :) 

||

||

بعدها ودونا على قرية قديمة في جيجو 

جممميلة القرية و اللي فيها يهبلون وطيبين ♥:( 

هنا ناكل الغداء في القرية مع باقي السياح اللي معنا بالتور :$ ! 
كانوا معاي ثنتين .. وحده ايرلنديه ووحده كندية ♥♥
الايلرلندية معلمة انجليزي في كوريا .. و الكندية تحب السفر وتسافر لكل مكان xD 

||

بعد ما خلصنا جولتنا في القرية .. رحنا لمنطقة نصعد فيها جبل .. او بركان قديم 

هالمنطقة مشهورة جدا بمراقبة غروب وشروق الشمس ♥

بس الوقت اللي حنا فيه لا هو غروب ولا هو شروق xD 

المكان كان مرتفع مره والدرج متعب متعب جدا :( 

كنت كل خمس دقايق اقعد ارتاح .. وتجي وحده عجوز كورية تضحك علي وتكمل مشيها 

نشيطة ماشاء الله عليها ♥ :( مدري وش بيصير علي لا صرت بعمرها :( ! 

صوره من فوق *^* ! 

وصلننناا اخيييرا !! كانت معنا صديقتنا الكندية في التور

وكانت مثلنا تتعب و نقعد نستهبل على بعض ونقعد نسولف وننسى نكمل xD !

كانت تقولنا [ هبيبي هبيبي ] يعني [ حبييبي حبيبي ] هههههههههه تقول انها تسمع هالكلمة لما كانت بمصر xD

هنا لما نزلنا صار لنا موقف مخيف :( 

 كان الوقت اللي لازم نكون فيه راكبين باص التور 

وقلت للتور قايد اني بروح اشتري ايس كريم انا واختي وبعدها بنركب الباص

ف أنتظرونا 

لما رحت اشتري .. اختي كانت جالسة بالكراسي وانا عند الثلاجة كان المكان زحمه كله صينيين 

وانتظرهم يبعدون عشان اشتري .. جاء واحد منهم بيمشي وماشاف رجلي و خطرفت له وطاح هههههههههههه 

انا سويت نفسي ما ادري .. هو قعد يناظرني وبعدين راح .. وقعد يناظر اختي 

بعدين تكلم بالصيني وجو اصدقاءه كثثثييرين ومعهم بنتين ! 

ويأشر علينا 

انا هنا قلت خلاصص راح يخطفوننا ويبيعوننا بسوق الاوادم بالصين ! 

جت البنت مسكتني انا واختي وصفتنا جمب بعض و جو اثنين وقفوا جمبنا 

والبنت تصور بالجوال هههههههههههههههههههههههههه ! 

اقسم بالله رجلي مو شايلتني من الخوف ! تنتفض واختي فيها الصيحة ههههههههههههههه 

وكل ما صور واحد راح وجاء الثاني وقف مكانه وصور ! 

ويوروننا الصوره ويتكلمون بالصيني .. انا مسكت اختي وهجينا للباص ههههههههههههه 

ونشوف التور قايد حقت السياح الصينيين ميته ضحك علينا 

طلعوا اول مره يشوفون عرب :| !
يشوفون اندونيسيين و ماليزيين متحجبين بس اول مره يشوفون مثل اشكالنا  :| ! 

لا عادت عليهم وعلى الايس كريم :( .. ركبنا الباص و الايسكريم مايع :( 

||

بعدها رحنا ع متحف للغوص الخاص بنساء جيجو
طبعا قديما كانوا النساء هم اللي يشتغلون ويكدون و يتعبون :( 
ومن اشهر المهن لهم قديما في جيجو .. الغوص 
فهالمتحف شهير لانه كان يحاكي واقع النساء في السابق 

بعدها رحنا على كهف تحت الارض كببببيير جدا 
وبااارد .. درجة الحرارى فيه 7 كحد اعلى  ♥♥
ينفع للنوم .. لا فيه لمبات يفتحونها اهلك عليك ولا فيه مكيف يسكرونه وتخيس بالحر 
جاهز مجهز بارد وظلام ههههههه ! 

جمميل مرره لكن ظلام :( عشان كذا اغلب الصور اللي صورتها جوا الكهف مو واضحة 

وعمميق .. مشينا 1000 متر لين وصلنا نهايته ! ♥

||

بكذا تكون هذي اخر محطة لنا في التور ! 

ودعنا التور قايدز و السواق و شكرناهم على لطفهم ^^ ♥♥ 

ورجعنا للبيت نجهز اغراضنا عشان نرجع لسيول :) ♥♥

ومن بكرا ودعنا الاجوما اللطيفة و خمتنا كلنا :( 

تعلقنا فيها وتعلقت فينا ! ♥

ووعدناها اننا نزورها في يوم ما ان شاء الله ^ ^ ! ♥♥

||

رحنا للمطار و حظنا الجميل قدمنا رحلتنا ووصلنا سيول بدري !! 

رحنا للهوتيل الجديد في ميونغ دونغ ! 

The grand 

اول مادخلنا استقبلونا بابتسامتهم اللطيفة ♥:( 

على طول حطينا عفشنا ونزلنا نتمشى في ميونغ دونغ ! احب هالشارع مره :( ♥ ! 

هنا دايم ينشبون لي البنات حقين محلات التجميل 
اوني ذيس ايز قود فور يور سكين 
اوني ذيس ايز قود فور يور ايز 

وانا ما اعرف اسهج احد .. لازم تسحبني وادخل المحل اتفرج :( ! 

سبااااااااااااااو !!!!!!!! 

ع قولتهم ماركة الاس ام 

هالمحل كل مارحت له قالوا لي بنسكر .. كل ما رحت قالوا بنسكر ! 

طفشت منهم لين قمت من صباح الله خير وصبحت عليهم ! كانوا توهم فاتحين ههههههه 

اشتريت نفس تيشيرت فيكتوريا :$♥♥ ! 

صور ايدولز الاس ام في كل مكان :( 

المحل جدا جميل :( !! 

||

||

في الليل قابلنا صديقنا سهيل :) 

وعزمنا على البينقسوو الكوري ♥ ! 

البينقسو كد جربته في مقهى كافي بيني اللي عندنا

لكن معليش ما يقارن بالنسخة الكورية ههههههههه  !

كان لذيذ لذيذ مررره $__$ !! 

||

بعدها اخذنا لهالنهر الجمييل ! 

للاسف نسيت اسم المكان :( ! 

كل وحده مع حبيبها وانا مع اختي نتهاوش :( ! 

شياطين هههههههههههههههههههههه ! 

شكلهم توهم مخلصين من المدرسة وجايين يستهبلون هنا 

||

من بكرا قررنا نروح لمعرض الرسوم المتحركة ^^ ♥

المعرض قريب من منطقتنها في مونغ دونغ ف قمنا الصبح نتمشى في اسواق ميونغ دونغ 

وكملنا مشي للمعرض♥

الحارة اللي حول المعرض كلها انيميشن في انيميشن ♥_____♥ !! 

البيوت عليها رسوم و الشوارع و كل مكان ! اتوقع انه مكان مثالي للاوتاكوز الكوريين♥ xD ! 

عشق اطفال الثمانينات والسبعينات  :)) ♥ !! 

هنا يورونا كيف يصورون الاماكن اللي بافلام الصلصال ♥♥

||
||

بعدها كملنا يومنا في نهر الهان . قلنا مستحيل نطلع من كوريا وحنا ماشفنا عرض جسر البامبو :(♥ ! 
ورحنا من بداية العصر وجلسنا عند النهر 



كل العالم كانوا ياكلون دجاج بالصويا :( ! ♥♥
فيه دبابات كثيره لمطاعم عند النهر و كل الكوريين يطلبون منه و ياكلون 
شي غريب كلهم كلهم ياكلون نفس الوجبة انا خلاص اشتهيتها بس موب حلال :(
اول ما رجعنا للسعودية رحت طلبت نفس الوجبة من بيتزا هت ♥♥ ♥♥:)) !

واخيييرررا العرض اللي انتظرناه طوويل :(  ! ♥
هو صراحة كان اقل من توقعاتي .. لكن جميل :$ 
والناس هادين و منسجمين مع العرض ♥

||

اليوم الاخير في كوريا ~ 
مدري شلون اوصف مشاعري بهاليوم :( 
هو اخر يوم نتمشى فيه بسيول و بكرا راح نرجع ! 

||



فهاليوم رحنا لحديقة الأولومبيات 
هي حديقة مبنية على ايام الاولومبيات في كوريا
حديقة كبيييرة مره ♥ ! و نظظظيفة وجميييلة و الطبيعة فيها مدري شقول عنها ♥♥ :"( !

هنا استأجرنا سياكل وقعدنا نفرفر الحديقة xD ♥ !
تقول اختي الله يستر لا يحسبوننا مثل فيلم وجدة مشافيح عالسيكل هههههههههههههههه

هذولا اللطيفيين اللي مدري شقول عنهم♥♥ :( ! 
كانو في عالكراسي وكل ما مرينا بالسيكل يسلمون علينا 
ويوم خلصنا ورجعنا لأهلنا جو وجابوا فرشتهم وقعدوا معنا هههههههه 
ما كنا نفهم بعض هم بالكوري ولا يفهمون انجليزي :(
بس يتضحكون و يرقصون و يغنون هههههههههههه

هنا الاجوما وزعت علينا عصير برتقال ♥♥:") !  

وهنا الاجاشي راح يشتري لنا ايس كريم 
لطافة بهالشيبان مدري شقول بس ♥♥♥♥♥♥♥♥ :( ! 
ايلوفيييووه اججاشي ♥ :( 

||

في الليل رحنا نتمشى في شارع جامعة هونقيك ♥

هذولا اتوقع انهم طلاب في الجامعة وفاتحين لهم محل ايس كريم صحي 
هالخبل ابو شوشة يقولنا [ تعرفون منصور ؟؟ ] قلنا منهو ذا ؟ 
قال واحد غني مرره ! اخو رئيسكم بالسعودية 
شكل الاخ مضيع ههههههههه اتوقع يقصد احد شيوخ الامارات ويحسبه سعودي :( ♥
وبعدين قعد يغني مع الاغنية اللي مشغلينها بالمحل .. وقالنا تحبون الكيبوب ؟ قلت ايه احب بيست 
وبنفس الوقت اشتغلت اغنية بيست صدفة هههههههههههههههههههههههههه 
قعد يرقص رقصتهم xD ♥ 

ايس كريم زبادي xD وحاطين لي الابرة فيها نكهة فراولة xD♥♥
البخار ذا اللي يطلع اتوقع قالي نيتروجين :| لاني اكت البسكوت و الدخان مازال يطلع من فمي xD

ذي الكوشكات اللي نشوفها بالدراما .. طول مانا بكوريا ما شفتها الا مره او مرتين بالشارع 
عاد لانه اخر يوم قلنا نجربها ونطلب شي بحري :$ 

طبعا ما يحتاج اقولكم قد ايش كانوا مستغربين مننا .. العرب كلهم يأكلون ب ايتوان 
ومافيه احد ياكل هنا ههههههههههههه 
بس نحب نجرب اشياء جديدة :$ ! 



وبكذا خلص تقريري الطويل والممل :$ بـ 210 صورة و ومليون سطر ثرثرة ! 
شكرا لتحملكم بثارتي xD ! 

قبل لا انهي البلوق .. 

راح اذكر بعض الملاحظات 

• اولاً : انسى المال في السفر ! كوريا ماهي اقل من غيرها بالغلاء و اكيد غالية ! اتمنى محد يسألني عن كم كلفتنا لاننا بمجرد ما نسافر ما نسأل اهلي كم صرفوا .. لكن اختصر لكم واقولكم انها غالية خصوصاً اذا كنتوا عائلة :) 
• ثانياً : انسى الراحة في السفر ! مشي مشي مشي .. حط هالشي فبالك لاي دولة تسافر لها مو بس كوريا لان اغلب التنقلات بتكون على رجلينك :) .. انسى السيارة 
• ثالثاً : انسى السهر و النوم ! قاعدة : نم بدري وقم بدري ! 
• رابعاً : انسى طباعك الشينة  ! تتقرف ؟ ما تحب تاكل اي شي ؟ ما تتحمل اي ريحة ؟ انا اختصر لك واقول لا تسافر ! 
• خامساً : احترم تقاليد البلد اللي انت فيها ! انت عندهم ضيف لا تهين تقاليدهم قدامهم مهما كانت حتى لو كانت دينية ! واحترم نفسك و احرص انك تنقل صورة جيدة ك شخص عربي ! 

||

التعليقات متاحة في مدونتي 

ما يحتاج لها تسجيل ^^ شرفوني بتعليقاتكم 

واي سؤال و استفسار انا في الخدمة 

لكن اتمنى تتجنبون الاسئلة الشخصية :) ! 

حساباتي : 

Ask me 

Twitter 

Instagram