السنة التحضيرية | PY - المسار الصحي

السلام عليكم ورحمة الله 

عادت صديقتكم للحياة من جديد :) 

عادت للتدوين الممل , عادت لحياتها السابقة ❤

ارحب بنفسي قبل ان ارحب بكم .. ..  امزح , بس تحمست شوي ..

فالبداية , ابارك لطلاب التحضيرية على تخصصهم اخيراً

مبروك لكل اللي تخصص التخصص الاول ف رغباته :)

ومبروك لطلاب الثانوية القبول في الجامعات  ❤
مرحلة جديدة مليانة انجازات تنتظركم ❤

||

طلاب جامعة الملك سعود المستجدين 

سعيدة لأنضمامكم معنا في الجامعة  ❤

اللي خلاني اكتب هالموضوع اني السنة اللي فاتت وبنفس هالوقت كنت ف مكانكم 

الحمدلله .. انتهت السنة بحلوها و مرها 

وجاء الوقت اللي انقل تجربتي لكم , عشان تكون عندكم الصورة الواضحة 

للمسار الصحي ببرنامج السنة التحضيرية بجامعة الملك سعود ❤ ^^ 

 على دفعتنا .. طبقوا نظام جديد ..
وأكيد سمعتوا فيه .. 

النظام الجديد للتخصيص ينص ان التنافس على التخصص حيكون بناءاً على نص المعدل التراكمي للسنة التحضيرية
+ نص مركبة القبول في الجامعة

يعني اللي مركبة القبول له عالية و شاد حيلة بالقدرات و التحصيلي و الثانوية
احب اقوله ان جهده ماراح يروح بهالبساطة ❤ ^^
و اللي موب مره مرتفعة .. مازال عنده فرصة يشد حيله في السنة التحضيرية . 


السنة التحضيرية : 
صدقوني على قد ماراح تكرهونها .. بتطلعون منها و انتم مستفيدين 

خلال هالسنة .. الوقت اللي بتقضونه بالجامعة ممكن يكون اكثر من الوقت اللي بتقضونه مع أهلكم 
الدوام لمعظم الطلاب ماراح يقل عن 8 ساعات .. و في البيت راح ينشغل الطالب بالمشاريع و الواجبات و المذاكرة 


بتكونون فخورين بأنفسكم نهاية السنة ❤ 




المسار الصحي في السنة التحضيرية :

الترم الأول : ماراح تحسون انكم ف مسار صحي أبداً xD المواد نفسها للمسار الإنساني و العلمي
مواد بسيطة وموحدة .. اتوقع الهدف من توحيدها تسهيل لعملية النقل بين المسارات لما يجي الترم الثاني
لان كثير من العلمي حولوا للصحي و العكس لما جاء الترم الثاني
فصعب جداً يأخذون 5 مواد صيفي ! . . طبعاً الترم الأول حتكونون تبع عمادة السنة التحضيرية بكل شي
يعني اختباراتكم و مشاريعكم و محاضراتكم كلها تحت مسؤولية عمادة السنة التحضيرية.
فبداية الترم حتحسون انه شي صعب و ارهاق .. لكن صدقوني الترم الأول هدية و فرصة انكم تجيبون فيه معدل عالي
لان التحضيرية تدخل في المعدل التراكمي لسنوات الجامعة كلها . استغلوا سهولة هالترم !!! 


الترم الثاني : الترم اللي حتتبرأ منكم العمادة  XD * امزح * بس حتكونون تبع كلية العلوم
و المادة الوحيدة اللي بتكون رابط بينكم وبين عمادة السنة التحضيرية هي الإنجلش
بهالترم حتحسون قد ايش كان الترم الأول سهل جدا xD ما أخوفكم .. لكن اعطيكم الصورة واضحة
الترم الثاني ماهو صعب بقد ما هو ( ضغط ) اختبارات كثييييرة و نادراً نلقى ايام فاضية
لكن المعلومات مكررة من الثانوي بشكل اعمق شوي ..

هذي نبذة عامة عن الترمين .. الحين راح اتكلم عن كل ترم و المواد اللي بتاخذونها فيه و اهم المصادر لكل مادة

The first semester : 

1- English  

وزن المادة : 8 ساعات << يلعب بالمعدل لعب :) 

 .. رحتوا تختبرون اختبار تحديد المستوى 

هالاختبار راح يحدد المستوى اللي تحتاجه عشان تطور لغتك الانجليزية .

في جامعة الملك سعود فيه 3 مستويات 

A , B , C 

 المستوى  A هو أقل مستوى و هو اللي حتكون ساعاته الدراسية كثيرة عشان يكون فيه تطور ملحوظ 

المستوى C هو أعلى مستوى .. و اقل مستوى بعدد الساعات الدراسية .. و أكثر مستوى مدلع الترم الأول xD

لكن مافيه افضلية .. يعني موب مثل جامعة نورة اللي بمستوى عالي له فرصة اكبر بالتخصصلالا لا تخافون الانجلش موحد بين المستويات بالاختبارات وتوزيع الدرجات الاختلاف الوحيد هو عدد الساعات الدراسية واختلاف عناوين المشاريع 

أنا كنت في ليفل سي .. الترم الأول كانت عدد الساعات الدراسية ساعة و 40 دقيقة بس .. بالإضافة ليوم أوف :$ 

ليفل بي 3 ساعات .. ليفل اي 4 ساعات ! 

الإختبارات موحدة لكل المستويات و المصدر موحد 

يعني اللي بيكون بليفل سي ... حيأخذ نفس الاختبار اللي بياخذه طالب بـ ليفل أي 

المصدر الأساسي بالاختبار : ملف ترسله لكم العمادة تذاكرون منه  

صدقوني الاختبار بسسسيط جدا جدا .. ما أقول هالكلام لاني ليفل سي .. حتى ليفل أي يحلونه بسهولة 

الصعوبة بس ب جزء الليسيننق و الريدينق .. حاولوا تطورون هالمهارتين خلال دراستكم . 

بالنسبة للكتاب : ليفل سي حياخذون كتب Qskills الترم الأول حتأخذون المستوى الرابع من سلسلة هالكتب و الترم الثاني بتأخذون المستوى الخامس . 

طبعاً أغلب التيتشرز *اذا موب كلهم* يسحبون على نص الكتاب

ويعطونكم نشاطات ثانية من عندهم 

CA Projects

بالترم الواحد حيكون عندكم مشروعين تقييم مستمر 

المشروع الأول .. راح تختارون موضوع من موضوعين اساسيين 

و تسوون له مايند ماب + تعريف ووصف للمشروع + عرض باوربوينت * أو اي وسيلة مرئية ثانية *

وراح يستمر المشروع 5  اسابيع 

وبتسوونه مره بالاسبوع قدام التيتشر و يتم رصد  درجة كل اسبوع على حسب الشغل المطلوب منكم 

المشروع الثاني مشروع خاص بمهارة الكتابة 

نفس الشي راح يخلونكم تختارون موضوع من موضوعين و تسوون مايند ماب و تبدأون تكتبون المسودة الأولى بالاسبوع الثاني

من بداية المشروع و المسودة الثانية الأسبوع اللي بعده و هكذا .. 

❤

هذا بالنسبة للأنجلش 

المادة جداً سهلة .. لكن لا تتهاونون فيها خصوصاً بمسألة الغياب 

ساعاتها كثيرة و استغليناها بالغياب 

الترم الأول ما كنت اغيب فيها كثير لان عندي اوف .. لكن الترم الثاني زادوا علينا عدد الساعات ..
 و صار الغياب بهالمادة موضة لطلاب الصحي xD

وترا اختبارات الميدتيرم دايما يختبرونكم فيها السبت :) 

2- Math 140

ريض 140

وزن المادة ساعتين

  مقدمة في الرياضيات .. طبعاً هالمادة موحدة مع بعض طلاب العلمي الترم الاول

 و بعضهم بياخذها الترم الثاني .. لكن الصحي كلهم راح ياخذونها  الترم الأول 

تعتبر مادة بسيطة .. اساسيات اخذناها بالثانوية 

لكن لا تتساهلون فيها كثير .. 

الدرجات حتكون موزعة على الواجبات و الكويزات و الميدتيرم و الفاينل 

* نسيت توزيع الدرجات كيف كان بالضبط * :( 

بالنسبة للواجبات .. على حسب الأستاذ ..

بعضهم راح يكلفون كل طالب بواجب 

وبعضهم كل قروب راح يمسك واجب لسيكشن كامل 

لكن بالنهاية كلكم راح تستفيدون من الأفكار المطلوبة بالواجبات 

فيه استاذ ف موقع السنة التحضيرية اسمه نضال الطلاع 

يشرع كل الدروس بطريقة سهلة وواضحة .. الله يجزاه الجنة جد شرحه فك ازمة لكل الطلاب ^^ 

هنا راح تلاقون المحاضرات كاملة : 

فيديو - شرح لمادة ريض140 

3- Communication skills 140

علم  140

وزن المادة ساعتين
مادة سهلة و خفيفة و تروح المحاضرة كلها سواليف ونشاطات
اسهل مادة لأغلب الطلاب لأنها المادة الوحيدة باللغة العربية 

المصدر الوحيد هو الكتاب , ذاكر الكتاب كويس و بتجيب الأي بلس بالراحة
فيه اسئلة عالبلاك بورد تقدرون تحلونها و تستفيدون منها لما تذاكرون


توزيع الدرجات لهالمادة بيكون
اختبار ميد
و اختبار فاينل
والمشروع
و الموضوع اللي بتكتبونه عالبلاك بورد << راح يكلمونكم عنه ان شاء الله

المشروع ..
 فيه اكثر من مشروع راح تختارون منه
و بتسوونه على مجموعات

اما تطوع خارج الجامعة
او تطوع داخل الجامعة
او فيلم قصير
او تغطية فعالية

وكل هالمشاريع بيفهمونهكم اياها الاسبوع الاول .. وتبدأون تجهزونها من الاسبوع الثالث 

4- IT تقن 140

وزن المادة 3 ساعات 

ممكن تكون المادة الأصعب لأغلب الطلاب 
عشان المصطلحات الانجليزية .. و كثرة المعلومات 

لكن كلها اشياء انتم عارفينها 

راح تاخذون مودل كامل عن الكمبيوتر و انواعه و الشبكات و الفايروسات 
و بعدها بتدخلون مودل الويندوز .. 

الميد راح تختبرون بهالجزئية بس .. وبعدها تنسونها خلاص 
ما تدخل بالفاينل 

بعد الويندوز بتاخذون الوورد و البوربوينت و الإكسل 
كلها اشياء مكررة و المعلومات بجزئية الفاينل اغلبها عملية .. فلا تشيلون هم الحفظ :) 


هذا بالنسبة للميد و الفاينل 

عندكم 10 درجات بتاخذونها بالراحة بشيء اسمه Take a challenge 
راح يقولون لكم كل شي عنه بالتفصيل 
هو موجود بموقع ايرا .. تقدرون تسوونه بأي وقت .. و تقدرون تفتحون الكتاب و تحلون 

يعني باختصار .. 10 درجات هدية لكم :) 

و عندكم 10 درجات للمشروع ( التعليم الذاتي ) 
احنا خيرونا بين  ( تعديل صورة .. او تصميم موقع ) 

الأغلب اختار تصميم موقع ببرنامج الببلشر 
خطواته جدا سهلة .. بيكون عندكم اسبوع يعلمونكم فيه كل شي 
و بعد ما تخلصون الموقع تكتبون التقرير و تدرجون الخطوات اللي سويتوها . 

❤

هذا بالنسبة للترم الأول نصيحة نصيحة جيبوا فيه معدل عالي ..
ماهو صعب ابدا 
كثثثثييييير اخذوا 5 بهالترم .. شدوا حيلكم فيه واستغلوا سهولته . 

The second semester : 

 , السمستر الثاني راح تاخذون 5 مواد : انجلش بالإضافة ل اربع مواد من كلية العلوم . 

الإنجلش ماراح اتكلم عنه كثير .. نفس الترم الأول بالضبط 
لكن راح تزيد عدد ساعات ليفل سي , و يعطونكم لغة انجليزية تخصصية  . 
اللي هي المصطلحات الطبية  , ماراح تختبرون فيها بس بتاخذونها زيادة معلومات . 


مواد كلية العلوم : 
هنا راح يبدأ التشتت بالمصادر , مو مثل الترم الاول لكل مادة كتاب و مصدر واضحين 
الترم الثاني البنات شوي تشتتوا بالنسبة للمصادر .. اللي اعتمدوا الكتاب و اللي اعتمدوا الملازم .. الخ 

بهالتدوينة انا راح اكلمكم عن [ مصادري اللي اخترتها لنفسي ]
اهم شي اهم شي .. لا تشتتون انفسكم بعدة مصادر , اختر مصدر او مصدرين لكل مادة و بس 

كثير طلاب بهالترم اعتمدوا المعلم الخصوصي 
اذا انت فعلاً محتاج خصوصي .. لا تبخل على نفسك لكن انا ما احرصك عليه 
تقدر بجهد ذاتي تجيب معدل 
التعليم الذاتي اهم بكثير .. انت اللي تعرف لنفسك و نفسك ايش تحتاج 
و الانترنت بحر من المصادر و المواقع التعليمية اللي ممكن تفيدك :) 

1- Physics
 

وزن المادة 3 ساعات 

لها قسمين عملي و نظري .. بتكلم عن النظري اول 

مادة الرعب لأغلب الطلاب , هي كلها مواضيع اخذناها بالثانوي
لكن الرعب بالدكتورات انفسهم , اغلبهم ما يعرفون يوصلون المعلومة زين 
و اغلب الطالبات ماخذين فيها خصوصي 
و يحضرون عشان ساعات الغياب بس .. لكن بعض المصادر كفيلة انها تفهمك المادة 

المصدر الوحيد اللي اعتمدته لهالمادة كان 
ملزمة الضياء + اسئلة سابقة كانوا يبيعونها لنا بمركز التصوير 

ملزمة الضياء راح تلاقونها بمكتبة المهندس سعرها 100 ريال باكيج كامل 
فيها ملزمتين .. ملزمة الميد الاول و ملزمة الميد الثاني 
وفيها كتيب قوانين و كتيب 3 اختبارات سابقة . 

بعض الاسئلة بالضياء ماهي محلولة , حاولوا تحلونها مع بعض 
وافهموا طريقة الاسئلة .. مافيه شيء حفظ بهالمادة . 

الميد الأول : 15 درجة 
بتختبرون ب 4 تشابترز ! اللي هي : معادلات الحركة - المتجهات - قوانين نيوتن - الشغل 

ذاكروها من الملزمة الأولى للضياء وفالكم الفل مارك 

الميد الثاني : 15 درجة * غالبا بيختبرنكم اياه يوم السبت :( * 
بتختبرون ب 3 تشابترز ! اللي هي : الموائع - الكهرباء - المرايا .

يبقى 3 تشابترز غالبا التشابتر الأخير يسحبون عليه 
ف أنتم وحظكم .. دفعتنا ما اختبرنا فيه بالفاينل 
ف أختبرنا ب 9 تشابترز بدل ال10 

التشابترز الأخيرة كلها تخص الفيزياء الذرية 

بالنسبة للعملي : 
راح يبيعون لكم ملزمة العملي بمركز تصوير الجامعة 
هي المصدر الموحد 
كل اسبوع بتاخذون تجربة فيزيائية 
و تسوون تقرير لها ( نصيحة سوو تقاريركم بدري لا تأجلون شي وتتوهقون مثلي :) ) 

 العملي له اختبارين 
 الاختبار العملي النظري :  يختبرونكم ب التعريفات و القوانين اللي بالملزمة 
وفيه ملزمة اختبارات نظري جمعتها استاة هدة الزيد و حطتها بمركز التصوير
اطلبوا منها تعطيكم اياها 
بالنسبة للعيال انا مدري شسالفتهم بس الظاهر اختبارهم يختلف 
هالإختبار بيكون يوم سبت .. وسهل مرره لا تشيلون همه  

الاختبار الثاني اللي هو العملي : بيوزعونكم مجموعات و يدخلونكم المعمل و يختبرونكم بتجربتين 
ويكون معطى لك سؤال و تجيبين نتيجته بالتجربة 
الكل كان متخوف من هالاختبار ,, بس تساهلوا معنا كثير عكس الفيزياء النظري 

الملخص للفيزياء 

• النظري : الضياء + اسئلة سابقة

• العملي : الملزمة و التقارير 

2- Organic Chemistry
 
وزن المادة ساعتين .. مالها جزء عملي الحمد لله
الكيمياء العضوية الرعب الثاني للطلاب , كنت اكرها بداية الترم بس عدت على خير
كانت تدرسني دكتورة زينب المرهون الله يرزقها هي منسقة المادة , سهلت المادة و اعطتنا اياها بصورة واضحة
وتعطينا امثلة كثير * كنا نطفش من الامثلة بس عرفنا وش فايدتها الحين * 
المصدر الاساسي بالنسبة لي لهالمادة 
 السلايدز 
والملاحظات اللي كنت اكتبها مع الدكتورة والشرح حقها, بعدها كنت اتدرب على اسئلة 
من ملزمة حسين سليمان .. الملزمة تلقونها بالمهندس وبرضو الاسئلة السابقة بتلاقونها بالتجمع 
وبعض الطلاب اعتمد ملزمة الكناني , شريتها لكن ما ستفدت منها 
شرحه بخط اليد ومو واضح وفيه معلومات اضافية ماهي معنا 

ملخص الكيمياء العضوية : 

• السلايدز 

•  الملاحظات مع الدكتور

• حسين سليمان للتدريب على الاسئلة فقط [ماذاكرت الشرح]

3- Biology ( Zoology ) 

وزن المادة 3 ساعات 

لها جزء عملي و جزء نظري ..  

أجمل مادة بكلية العلوم , تربطنا علاقة عشق مع هالمادة ومع اعضاء هيئة التدريس ومع كل شي يخص هالقسم 

 قسم علم الحيوان مره مره مره متعاونين مع الطلاب , و مصادرهم واضحة وما تشتت ابداً

و يسمعون لاراء الطلاب و شكاويهم و يحاولون يسهلون لكم المادة

بتكلم عن الجزء النظري أول

راح تدرسون اول المحاضرات عن الكربوهيدرات و البروتينات و الدهون .. الخ

بعدين بتدخلون عالخلية و انواعها .. و بعدها بتتعمقون بشكل اوسع بالخلية الحيوانية 

بتاخذون مكوناتها بشكل تفصيلي .. بعدها بتدخلون على الوراثة و الامراض الوراثية 

و اخر محاضرتين بتاخذون عن هرمونات للغدد الصماء . 

الجزء النظري له اختبارين ميدترم و اختبار فاينل 

 الميدتيرم الأول : 15 درجة * على 30 سؤال كل سؤال ب 0.5 * 

بتختبرون ب اول 8 محاضرات . 

الميدتيرم الثاني :  15 درجة * على 30 سؤال كل سؤال ب 0.5 * 

الفاينل : 40 درجة  * 80 سؤال كل سؤال بنص درجة * 

المصدر الوحيد اللي اعتمدته لهالمادة :

السلايدز ! السلايدز ! السلايدز ! 

و النقاط اللي تستصعب علي شوي اشوف شرح بروفيسور اشرف 

عالبلاك بورد يشرح بالصوت عالسلايدز و شرحه جميل و يربطها بامثلة عشان ما ننساها 

* الرايبوسوم و الـ RNA مثل الساندويتش * xD

محاضراته بتلاقونها عالبلاك بورد .. ركزوا عليها بالفاينل لان هو اللي يختار الاسئلة 

الجزء العملي

الجزء العملي عبارة عن جزئين ( هستولوجي و اناتومي ) 

راح تبتدأون بالهستولوجي  .. بتاخذون محاضرة بالاسبوع 

و بتاخذون فيها شرائح تحت المجهر - بتاخذون شرائح كثثثيره - 

بكل محاضرة تقريبا 8 شرائح على حسب المحاضرة و المطلوب ترسمون الشرائح 

و تحفظون اشكالها 

بعد ما تخلصون الهستولوجي بتختبرون الفاينل الأول 

الاختبار عبارة عن شرائح و كل شريحة عليها سؤال + اخر سؤال ترسمون شريحة 

و بعدها بتنسون الهستولوجي و القلق حقه و بتفتكون من الرسم و المجاهر

وبتدخلون عالاناتومي ( التشريح ) لكن قبل التشريح بيعطونكم محاضرة وحده عن فصائل الدم 

و بيدرسونكم كيف تعرفون فصائل الدم و بتاخذون معها جزئية بسيييطة مره عن الصفات الوراثية 

وبعد هالمحاضرة يبدأ تشريح الجرذ 

محاضرتين تشريح .. الاولى عن الجهاز الهضمي .. المحاضرة الثانية الجهاز التناسلي . 

وبتختبرون الفاينل الثاني و بتخلصون من المعمل و الاحياء العملي .

مصدر الفاينل الأول : الملزمة اللي صورناها بداية الترم وهي اللي نرسم فيها 

مصدر الفاينل الثاني : صور تشريح الفأر + صور فصائل الدم + صور الصفات الوراثية 

الفاينل الثاني اسهل بكثثثير من ناحية مذاكرة 

لكن من ناحية اختبار كلهم سهلين وواضحين .  

بالنسبة للنظري  : العيال و البنات مافيه شي يختلف 

اما العملي فيه اختلاف مادري ايش هو بس اللي سمعته ان العيال اسهل 

3- STAT 145 ( Statistics )

الإحصاء الحيوي يعتبرونه الطلاب اسهل مادة من مواد كلية العلوم 

* عن نفسي اكرهه لأنه ممل جداً * 

كل الامثلة و الاسئلة عبارة عن احصائيات مرضى و امراض و مستشفيات 

بتفيدكم هالمادة بالبحوث مستقبلاً ان شاء الله . 

بدياة الترم قالوا لنا نشتري ملزمة بروفيسور الشيحة من مركز التصوير

وهي المصدر الرئيسي 

ذاكروا الملزمة زين و التطبيق عالاختبارات السابقة 

الاختبارات السابقة مهمة مره و فيها لف ودوران 

قسم الاحصاء و الفيزياء اكثر قسمين يحبون يلفون ويدورون بالاسئلة 

بس اللي بيذاكر الاسئلة السابقة و يطبق عليها بيعرف كيف يفكرون xD

الميدالأول : 30 درجة  .

الميد الثاني : 30 درجة  .

الفاينل : 40 درجة .

خليكم واثقين انكم قدها و التحضيري عقبة بسيطة بينكم و بين التخصص

اللي بيتمسك بحلمه راح يشد حيله 

لا تستسلمون على اخر لحظة .. خصوصا الترم الثاني

شفت قدامي حالات احباط و يأس و اللي حول مساره واللي سحب ملفه عشان 

يروح لجامعة ثانية 

مو من اول صعوبة تيأسون هذي هي الجامعة 

خصوصا التحضيري تعب نفسي وتشتت لانك ما تخصصت 

بمجرد ما تخلص وتتخصص بتنسى التعب و الكرف اللي صار

هذي بعض اجوبة الاسئلة اللي عارفة انكم بتسألونها : 

- كم معدل التخصص ؟ 

قلت لكم فوق نظام التخصيص و بالنسة لمعدلات التخصيص هالسنة بتشوفونها بموقع القبول و التسجل 

- ايش هو البلاكبورد ؟

موقع لعمادة التعليم الالكتروني https://lms.ksu.edu.sa/

- الاختبارات موحدة بين العيال و البنات ؟ 

الترم الاول : كل شي موحد 

الترم الثاني : الميدتيرمز كل قسم له اسئلته بس الفاينل موحد .

اي سؤال او نقطة حسيتوا اني ما شرحتها بطريقة واضحة اسألوني 

بالتويتر او الاسك او بالكومنتس تحت : 

twitter : @amai8onna

Ask : @amai0onna